A VOLTAS CON EXIPTO

E seguimos con Exipto. Tentamos abandoar o tema, pero os golfiños non están dispostos. O último é un conto inventado por todos, coa inestimable axuda das familias, ambientado en Exipto e no que os personaxes elixidos pertencen a esta antiquísima cultura; a verdade é que está quedando precioso, graciñas a todos pola vosa colaboración. Sabemos xa moitísimas cousas: que o rei Tutmosis foi o descubridor da esfinxe, que a raíña Cleopatra morreu pola mordida dunha cobra, que Tutankamón é o faraón neno... e tantas outras cousas, ata sabemos facer momias e papiros!


Consultamos moitos libros e cando atopamos algo interesante marcámolo mentras a profe ou algún dos nosos compañeiros nos sacan fotos, despois explicámosllo ós outros compañeiros.


Pintamos deuses, pirámides, e imos á pantalla dixital a consultar internet e a traballar: localizamos nun mapa mundi España e Exipto e logo fixemos unha viaxe virtual en barco e en avión, trazamos a ruta que seguiríamos ata chegar alí e logo tivemos unha pequena discusión, a profe dicía que non se podía ir en coche e nós dixemos que sí, Adrián e Alejandro dicían que só había que ir polos cadriños de cores (países) e demostrárono, e a profe disculpouses e dixo que tiñan razón, levounos moito tempo pero aí está o resultado




Agora só nos falta darlle forma a todo o que sabemos para que nos quede nun libro gardado.
Pero por suposto seguimos traballando noutros temas e outro que nos apasiona é o corpo humano; nunhas radiografías descubrimos todos os osos do corpo e ata o corazón e os pulmóns que a profe non vía.